Ministria shkruan se disa operatorë i kanë mashtruar konsumatorët pasi të mërkurën i kanë zbrazur raftet e vajit ushqimor, duke krijuar përshtypjen se ka mungesë, ndërsa më pas i kanë rikthyer, me çmim 3.49 euro për litër dhe ka apeluar te qytetarët që të mos bien pre e manipulimeve tregtarëve të pandërgjegjshëm
“MINT fton qytetarët e Republikës së Kosovës të mos bien pre e manipulimeve të tregtarëve të pandërgjegjshëm. Qytetarët nuk kanë nevojë të furnizohen me rezerva të produkteve ushqimore esenciale. Furnizimi me këto produkte është i rregullt, por disa operatorë ekonomikë kanë shfrytëzuar situatën në mënyrë të egër, duke ndjellë panik te qytetarët – njëherë duke fshehur mallin e pastaj duke e rikthyer me çmim tejet të lartë”, thuhet në komunikatë.
MINT ka bërë të ditur se inspektorati i tregut po merr masa ndëshkuese veprime të përcaktuara me ligj për manipuluesit, dhe në të njëjtën kohë fton qytetarët për bashkëpunim më organet kompetente
“Për çdo mashtrim që mund të ndodhë gjatë blerjeve e në veçanti për çmime, qytetarët luten të njoftojnë menjëherë Departamentin për Mbrojtjen e Konsumatorit në numrin e telefonit 0800 11000 ose në platformën https://konsumatori.rks-gov.net/”, thuhet tutje.
