Inspektorati Qendror i Punës, ka reaguar ndaj deklarimeve për numrin e vdekjeve në vendin e punës, duke i quajtur të pasakta dhe të pa verifikuara.
Në një reagim publik nga ky institucione është bërë e ditur se nga janari e deri më 1 gusht, numri i të vdekurve në vendin e punës është 9.
“Duke u bazuar në të dhënat zyrtare, të verifikuara dhe të përpunuara nga inspektorët dhe Divizionet e inspektimeve ne Rajonet e Inspektoratit Qendror të Punës, në gjashtëmujorin e parë të vitit 2025 kanë humbur jetën 7 punëtorë si pasojë e aksidenteve në vendin e punës. Deri më datën 1 Gusht 2025, ky numër ka arritur në 9 viktima, si rezultat i moszbatimit të masave të detyrueshme të sigurisë nga ana e punëdhënësve dhe këto janë të dhëna zyrtare. Inspektorati Qendror i Punës i shpreh ngushëllimet më të sinqerta familjarëve të viktimave dhe njëkohësisht siguron opinionin publik se po ndërmerr të gjitha masat e mundshme për të mbrojtur jetën dhe shëndetin e të punësuarve, duke aktivizuar të gjithë kapacitetin njerëzor dhe logjistik në dispozicion”, thuhet në reagimin e tyre.
Inspektorati ka bërë të ditur se përveç inspektimeve ka ndërmarrë edhe aksione të posaçme në sektorin e ndërtimit, i cili vazhdon të paraqesë një nga sektorët më të rrezikuar për sa i përket aksidenteve në punë.
“Inspektorati Qendror i Punës u bën thirrje të gjithë punëdhënësve që të përmbushin detyrimet ligjore për sigurinë dhe shëndetin në punë, si dhe të respektojnë rregulloret në fuqi, në mënyrë që të parandalohen humbjet e jetëve njerëzore dhe të garantohet një mjedis pune i sigurt dhe dinjitoz. Përgjegjësia për zbatimin e masave të sigurisë në punë është e padiskutueshme dhe çdo shkelje do të trajtohet me seriozitetin maksimal, sipas dispozitave ligjore në fuqi”, thuhet tutje.
Ne gjashtëmujorin e parë te vitit 2025 sipas inspektoratit janë kryer: 4751 inspektime, janë shqiptuar 788 gjoba, Inspektime te përbashkëta me institucionet e tjera 147, gjithsej kanë qenë 268 aksidente,janë trajtuar 702 ankesa nga palët./teve1.info/
