Zyra e Kryeprokurorit të Shtetit ka iniciuar procedurë disiplinore ndaj prokurorit të rastit të Sebahate Morinës, e cila u vra nga bashkëshorti i saj dy vite më parë, raporton teve1.info
Sipas komunikatës Zyrës së Prokurorit të Shtetit, nisja i procedurës disiplinore u bë pas vendimit të Gjykatës Kushtetuese.
“Zyra e Kryeprokurorit të Shtetit njofton opinionin e gjerë publik se pas vendimit të Gjykatës Kushtetuese lidhur me rastin e të ndjerës Sebahate Morina, autoriteti kompetent në kuadër të institucionit të Prokurorit të Shtetit ka iniciuar procedurën disiplinore ndaj prokurorit të këtij rasti.
Për epilogun e kësaj procedure opinioni publik do të njoftohet me kohë”, thuhet në njoftimin e Prokurorisë së Shtetit.
Më 14 mars 2021, Sebahatja ishte rrugës për në vendin e saj të punës, por pak metra pa mbërritur, u vra nga ish-bashkëshorti i cili, sipas raporteve zyrtare, e kishte rrahur e keqtrajtuar më parë.
Sebahate Morina u vra nga ish-bashkëshorti më 14 mars 2021 në Prishtinë, derisa Gjykata Kushtetuese e Kosovës kishte konstatuar më 22 mars të këtij viti se shteti “ia shkeli të drejtën për jetë”.
Dhjetë ditë para se Sebahatja të vritej, sipas raportit të Instituti i Kosovës për Drejtësi, njëra nga vajzat e saj raportoi në polici dhunën që po ushtrohej ndaj nënës së saj.
Ish-bashkëshorti e kishte sulmuar Sebahaten sërish fizikisht.
Policia ndërmori masa hetimore. Intervistoi Sebahaten e cila konfirmoi se ishte viktimë e dhunës fizike. Ish-bashkëshorti i saj u intervistua po ashtu dhe mohoi sulmin. Sebahatja u ftua të intervistohej sërish një ditë pas, më 4 mars. Policia thotë se nuk u paraqit në stacion policor.
E, për dhjetë ditë të tjera, as policia e as prokuroria nuk ndërmori asnjë masë.
Në ditën e 11-të ajo u vra.
