Infrakos Sh.A ka thënë se është e përkushtuar të përmbush kërkesat e punëtorëve dhe këtë përmes dialogut me sindikatën.
Në një deklarim për media nga “Infrakos” është thënë se përkundër problemeve financiare në takime kanë sqaruar se kërkesat e tyre d të trajtohen me prioritet.
Në deklaratë aty thuhet lëshimi në funksion i lidhjes së 10-të hekurudhore do të ndikojë në të hyrat financiare.
“Në takimet e rregullta që kemi zhvilluar me përfaqësuesit e Sindikatës së Pavarur, kemi shprehur vullnetin tonë për dialog dhe bashkëpunim. Ne kemi sqaruar se përkundër vështirësive financiare aktuale, kërkesat e tyre do të shqyrtohen me prioritet sapo të krijohen kushtet e përshtatshme financiare – veçanërisht pas vënies në funksion të linjës së 10-të hekurudhore, që do të ndikojë pozitivisht në të hyrat e kompanisë. Synimi ynë është, që në bashkëpunim të ngushtë me Bordin e Drejtorëve dhe Sindikatën, të bëjmë hapa konkretë drejt përmirësimit të kushteve të punës dhe rritjes së pagave, në përputhje me mundësitë që do të krijohen në një të ardhme të afërt”, thuhet në komunikatë.
Nga kjo ndërmarrje kanë përmendur disa veprime që kanë bërë në dy vjetët e fundit për përmirësimin e kushtetove të punëtorëve.
“Që nga ndarja e sektorit hekurudhor në dy kompani të pavarura në vitin 2011, Infrakos Sh.A është përballur me sfida të vazhdueshme financiare, kryesisht si pasojë e rënies së aktiviteteve të transportit hekurudhorë dhe investimeve në rehabilitimin e linjës 10 hekurudhore. Pavarësisht këtyre sfidave, ne kemi treguar përkushtim të vazhdueshëm për të përmbushur detyrimet ndaj punonjësve tanë për të përmirësuar kushtet e tyre të punës. Në dy vitet e fundit ne kemi përfshirë sigurimin e shujtave dhe mbulimin e sigurimeve shëndetësore për të gjithë punonjësit tanë. Gjithashtu, kemi arritur të përmbushim obligimet e prapambetura ndaj Administratës Tatimore të Kosovës, duke përfshirë kontributet pensionale të punonjësve që nuk ishin paguar ndër vite – një, hap i rëndësishëm që kap vlerën mbi 900,000 euro”, thuhet në komunikatë.
Punëtorët e kësaj ndërmarrje kanë protestuar të hënën duke kërkuar kushte më të mirë pune.
Përfundimisht, Infrakos Sh.A mbetet e përkushtuar ndaj dialogut konstruktiv dhe ndaj përmirësimit të vazhdueshëm të mirëqenies së punonjësve, duke synuar një të ardhme të qëndrueshme dhe të suksesshme për të gjithë.
