Të mërkurën (18 qershor) në orët e paradites në Gjykatën Themelore në Suharekë, ka ndodhur një incident në mes të palëve që kanë qenë të ftuar për shqyrtim gjyqësor.
Siç thuhet, në hyrjen e oborrit të gjykatës, kur palët po hynin pa kaluar kontrollin e sigurimit dhe kontrollit fizik, njëra palë ka nxjerrë një mjet të fortë nga çanta e tij, dhe ka sulmuar palën tjetër.
Në ato momente ka reaguar edhe sigurimi fizik i gjykatës, të cilët ndodheshin brenda objektit të gjykatës, dhe kanë ndaluar konfliktin dhe menjëherë është lajmëruar Policia e Kosovës, e cila ka vazhduar me procedurën hetimore, dhe palës që ka pësuar lëndimet i është dhënë ndihma mjekësore, derisa kanë arritur ekipet e emergjencës.
Gjyqtari mbikëqyrës i Gjykatës Themelore, Dega në Suharekë, ka ofruar bashkëpunimin e plotë për Policinë e Kosovës me qëllim të zbardhjes së ngjarjes.
