Imri Ahmeti ka konfirmuar se do të jetë sërish kandidat i Lidhjes Demokratike të Kosovës (LDK) për kryetar të Komunës së Lipjanit në zgjedhjet lokale të 12 tetorit. Lajmin e ka bërë të ditur vet ai përmes një postimi në Facebook, duke theksuar se ky është një rrugëtim i zemrës dhe jo vetëm politik.
“PO, do të kandidoj sërish për Kryetar të Komunës së Lipjanit. Një rrugëtim që s’është veç politik, por edhe rrugëtim i zemrës, sepse Lipjani është pjesë e jetës sime, e përditshmërisë dhe e ëndrrave të mia”, ka shkruar Ahmeti.
Ai shtoi se në mandatin e tij aktual janë realizuar shumë projekte që kanë ndryshuar pamjen e qytetit dhe fshatrave, por theksoi se ende ka shumë punë për të bërë.
“Ka projekte që presin të përfundojnë, rrugë që presin të hapen dhe vizione që duam t’i bëjmë realitet. Me mbështetjen tuaj, nuk mund ta lëmë në gjysmë besimin dhe punën që kemi nisur bashkë, për një Lipjan edhe më të mirë”, theksoi ai.
Ahmeti e konsideron kandidimin e tij si mundësi për vazhdim të punëve të mira, jo për pushtet apo lavdi, por për përkushtim dhe progres.
“Jo për pushtet, por për vazhdimësi. Jo për lavdi, por për punë e përkushtim. Ju ftoj të ecim bashkë, me besim dhe me punë, për Lipjanin që e duam”, përfundoi ai.
