Politologu, Dorajet Imeri e ka vlerësuar si formale dhe pa efekt real politik dorëheqjen e Lumir Abdixhikut nga pozita e kryetarit të Lidhjes Demokratike të Kosovës, duke thënë se ajo është bërë vetëm për të zbutur tensionet pas rezultatit të dobët zgjedhor të LDK-së në zgjedhjet e parakohshme parlamentare të 28 dhjetorit.
Në emisionin “Ditari” në Tëvë1, Imeri është shprehur i bindur se Abdixhiku do të zgjidhet sërish kryetar i LDK-së në Kuvendin e partisë që do të mbahet të shtunën, më 31 janar.
“Mua më duket se dorëheqja e Lumir Abdixhikut është sa për sy e faqe në kuptimin politik, vetëm për të zbrapsur disi tensionin e madh që u krijua pas rezultatit zgjedhor. Struktura që vendos për fatin e tij përbëhet kryesisht nga njerëz të vendosur prej tij, andaj një dorëheqje e tillë nuk prodhon rezultat real dhe nënkupton që ai do të jetë sërish kryetar partie të shtunën”, ka thënë Imeri.
Ai ka shtuar se zhvillimet e fundit tregojnë për përçarje të brendshme në LDK, duke përmendur faktin se ka më shumë se një kandidat për kryetar, si dhe kritikat e ashpra ndaj Abdixhikut nga anëtarja e partisë, Hykmete Bajrami.
Sipas Imerit, megjithëse përgjegjësia për humbjen në zgjedhje nuk i takon vetëm Abdixhikut, barra kryesore bie mbi udhëheqësin e projektit politik.
“Nuk ka qenë tërësisht faji i Abdixhikut për rezultatin e zgjedhjeve, por natyrisht pjesa më e madhe e përgjegjësisë i takon atij që i prin projektit politik. Në LDK mungon debati i thellë dhe përmbajtësor, e mbi të gjitha mungon orientimi strategjik. LDK-ja ka një histori të jashtëzakonshme, por e keqja është se ka mbetur vetëm me histori, pasi tash e më shumë se 20 vjet nuk ka fituar asnjë palë zgjedhje në nivel nacional. Fakti që ka më shumë se një kandidat të propozuar për kryetar, kërkesa e Avdullah Hotit për të kërkuar besimin e partisë në Kuvendin e këtij subjekti, si dhe qëndrimi i ashpër i nënkryetares Hykmete Bajrami ndaj Abdixhikut, duke kërkuar dorëheqjen e parevokueshme të tij, më shtyn të besoj se në LDK tashmë ka filluar një përçarje e madhe dhe e dukshme”, ka deklaruar Imeri.
Ndryshe, Lidhja Demokratike e Kosovës ka thirrur Kuvendin e partisë për 31 janar në orën 12:00.
Mbledhja e Kuvendit të LDK-së vjen pas ofrimit të dorëheqjes nga kryetari aktual Lumir Abdixhiku, i cili pas rezultatit të dobët më 28 dhjetor tha se është i gatshëm të dorëhiqet, por dorëheqjen e tij nga drejtimi i partisë duhet ta aprovojë Kuvendi.
Në ndërkohë, deri tani, kandidaturën për kryetar të LDK-së e ka shpallur vetem Avdullah Hoti, ish-kryeministër i Kosovës./teve1.info/
