Ajo tregon për shërbimet shëndetësore që të burgosurit marrin brenda kësaj qendre korrektuese, ndërsa potencon se për rastet kur nuk mund t’u ofrojnë shërbime, të njëjtit dërgohen në Spitalin Rajonal të Pejës, Institutin e Forenzikës Psikiatrike dhe në Qendrën Klinike Universitare të Kosovës.
“Qendra Korrektuese e Dubravës i ka afërsisht 900 të burgosur. Prej tyre që marrin trajtim të drejtpërdrejtë që janë të vendosur në spitalin e burgut dhe në aneksin e spitalit janë 52 të burgosur, këtu përfshihen të burgosurit që kanë sëmundje organike edhe të burgosur që kanë probleme me shëndetin mendor. Trajtimi të burgosurve u jepet 24 orë, do të thotë që 24 orë spitali i burgut është i mbuluar me mjekët dhe me teknikët medicinalë gjithashtu. Përpos mjekëve janë edhe specializantët që shërbejnë në mënyrë të rregullt për trajtimin e të burgosurve në lëmi të ndryshme. Mirëpo, nëse ka raste të sëmundjeve që nuk mund të trajtohen këtu, atëherë me rekomandim të mjekut dhe të specializantëve, të burgosurve u mundësohet edhe trajtimi jashtë institucionit, do të thotë në Spitalin regjional të Pejës dhe në QKUK… Brenda burgut u ofrohet një trajtim sikurse në Shtëpi të Shëndetit, që janë trajtimet dhe kontrollet rutinore që bëhen për të burgosurit, edhe për të burgosurit që janë të vendosur organik dhe psikiatrik për nevojat e tyre”, tha ajo në emisionin “De Jure” në Tëvë1.
Sipas saj, sfidë për këtë qendër korrektuese është trajtimi i të burgosurve që vuajnë nga çrregullimet mendore, e që numri i tyre që vuajnë dënimin në Dubravë është 90. Nga ky numër, Imeraj tha se 20 të burgosur janë të sëmurë rëndë dhe marrin trajtim shëndetësor në Njësinë Shëndetësore të Burgut.
Për më shumë ndiqeni hulumtimin “Shërbimet shëndetësore në burgje”, i cili po transmetohet në “Tëvë1” dhe “Betimi për Drejtësi.
