Që nga dje, Imer Hakaj do ta zëvendësojë Bislim Zogajn në krye të Agjencisë për Menaxhimin e Monumenteve dhe Komplekseve Memoriale.
Zogaj ka thënë se puna e deritanishme nuk ishte e lehtë, përderisa është përballur me presione e shantazhe.
“Punët e mia kanë qenë të lidhura ngushtë me historinë dhe trashëgiminë tonë të çmuar. Përgjegjësia për të ndërtuar dhe ruajtur monumentet dhe memorialet ka qenë një sfidë e madhe, ku shpeshherë u përballa me shqetësime të ndryshme, prej keqkuptimeve, presioneve e deri te shantazhet, por me përkrahjen e ekipit tim të mrekullueshëm, kemi arritur t’i tejkalojmë ato dhe të sjellim rezultate të shkëlqyera”, ka shkruar ai.
Përderisa ka shtuar se është i vetëdijshëm që nuk ka arritur ta bëjë më të mirën e dëshirueshme.
“Jam i vetëdijshëm që nuk kemi arritë të bëjmë më të mirën e dëshirueshme, megjithatë jam i lumtur dhe krenar që kemi arritur t‘i realizojmë disa projekte që i kanë munguar Kosovës dhe përmes tyre u kemi kthyer buzëqeshjen dhe krenarinë shumë familjeve gjithandej Kosovës”, ka shkruar Zogaj në FB.