Kandidati i Aleancës për Ardhmërinë e Kosovës për kryetar të Komunës së Lipjanit, Ilir Tasholli ka njoftuar për dorëheqjen nga gara.
Sipas tij, vendimi është marrë për arsye objektive dhe me bindjen se në këtë fazë, një hap i tillë është më i miri për rrugëtimin e tij të mëtejmë.
“Dua t’ju njoftoj se, për arsye objektive, kam vendosur të ndal aktivitetin tim politik brenda Aleancës për Ardhmërinë e Kosovës, të tërhiqem nga kandidatura për Kryetar të Komunës së Lipjanit, si dhe nga të gjitha funksionet që kam ushtruar deri më tani. Ky vendim nuk ka qenë i lehtë, por është marrë me bindjen se në këtë fazë, një hap i tillë është më i miri për rrugëtimin tim të mëtejmë”, ka shkruar ai në Facebook.
Tutje, ai ka falënderuar qytetarët, bashkëpunëtorët dhe miqtë për mbështetjen e vazhdueshme ndër vite, duke nënvizuar se përkushtimi për të mirën e qytetarëve nuk përfundon me këtë hap.
“Falënderoj me zemër të gjithë bashkëpunëtorët, miqtë dhe qytetarët që më kanë mbështetur pa hezitim ndër vite – në sfidat lokale dhe ato qendrore. Mbështetja juaj ka qenë motivimi më i madh në çdo angazhim timin. Betejat politike nuk përfundojnë këtu. Do të shihemi sërish – me të njëjtin përkushtim për të mirën e qytetarëve dhe të vendit tonë”, ka shtuar Tasholli.
Kryetari aktual i Komunës së Lipjanit është Imri Ahmeti, nga Lidhja Demokratike e Kosovës dhe ka qenë në këtë detyrë pa ndërprerje që nga dhjetori i vitit 2013, duke e siguruar mandatin e tretë radhazi në nëntor 2021
