Kandidati për kryetar të Komunës së Gjilanit nga Partia Guxo, Ilir Poroshtica, ka deklaruar se garon me një koncept krejtësisht të ndryshëm nga kandidati tjetër politik, Alban Hyseni i Lëvizjes Vetëvendosje.
Poroshtica theksoi se hyrja e tij në garë nga Partia Guxo është “një zgjedhje jashtë normave standarde të politikbërjes”.
Ai deklaroi në emisionin “Këndi i Debatit” se kandidatura e tij si arkitekt i jep vlerë dhe dinamikë të re zgjedhjeve lokale në Gjilan.
“Jemi dy kandidatë të ndryshëm në Gjilan. Ne kandidojmë me dy versione të ndryshme, duke u nisur nga fakti se kemi pluralizëm politik dhe u jepet mundësia qytetarëve për qasje të ndryshme të pushtetit”, tha Poroshtica në Tëvë1.
Ai shtoi se kandidimi përmes Guxos është bërë për t’i dhënë qytetarëve një mundësi reale zgjedhjeje.
Ndërkohë që në adresë të Vetëvendosjes, Poroshtica shprehu zhgënjim për mënyrën se si ka qeverisur kryetari aktual Alban Hyseni.
“Qëllimi im gjithnjë ka qenë të jem afër kryetarit Hyseni, mirëpo ajo çfarë ka ndodhur jo vetëm me Ilirin, por me një pjesë dërrmuese të VV-së, është se Albani duke u vetëkënaqur me pozitën e kryetarit, filloi t’i harrojë ata që e ndihmuan për ta fituar garën. Momenti që filloi përçarja dhe pakënaqësia, atëherë menduam për një version tjetër, duke u afruar me Guxo”, deklaroi Poroshtica./teve1.info/
