Eksperti Ilir Kulla, në emisionin “Matrix” në Tëvë1 me Mehmet Kalisi, ka komentuar protestën e dytë të studentëve të mbajtur sot në Shkup për gjuhën shqipe.
Kulla tha se vite më parë kishte paralajmëruar se pas zgjedhjeve në Maqedoninë e Veriut mund të krijohej një konflikt politik brenda shqiptarëve.
“Para dy viteve në këtë emision kam thënë se pas përfundimit të atyre zgjedhjeve do të krijohej një konflikt shqiptaro-shqiptar dhe koha më dha të drejtë. Nuk ka dilemë, madje edhe nga pala maqedonase dhe opozita e pushteti pranohet se çështja e gjuhës shqipe nuk diskutohet, sepse shqiptarët janë ata që e mbajnë shtetin në këmbë atje. Sa më shumë njerëz që dalin në protesta, aq më shumë i shtohet elektorati Mickoskit”, ka thënë Kulla.
Sipas tij, ekziston një dallim mes aspektit politik dhe atij teknik të çështjes.
“Ka një problem të madh, sepse Mickoski nëse nuk mban qëndrim të ngurtë, atëherë nuk mbledh njerëz aty. Problemi është se shqiptarët janë të përçarë dhe të defaktorizuar politikisht. Teknikisht, çështja është se nuk kanë problem me gjuhën apo arsimin, por me cilësinë, dhe këtu është kurthi dhe shkelja më e madhe”, u shpreh ai.
Kulla theksoi gjithashtu se arsimi nuk duhet të politizohet.
“Ne duhet t’u themi të rinjve të vërtetën si shtresë intelektuale: arsimi dhe edukimi në tërësi është shumë i rëndësishëm dhe nuk duhet të luajmë me të, për të mos dëmtuar çështjen kombëtare”, përfundoi Kulla.
