Drejtori i Global Crisis Group, Ilir Kulla, ka komentuar zhvillimet pas samitit të NATO-s, duke folur për marrëdhëniet mes Shteteve të Bashkuara të Amerikës, Turqisë dhe Bashkimit Evropian.
Në emisionin “Matrix” në Tëvë1, ku ishte i ftuar në moderim nga Mehmet Kalisi, Kulla tha se presidenti amerikan Donald Trump mori pjesë në samitin e NATO-s për shkak të presidentit turk Recep Tayyip Erdogan.
“Vetë Trump e tha se shkoi në samitin e NATO-s vetëm sepse ishte Erdogani. Nëse ai nuk do të ishte aty, Trump nuk do të shkonte”, tha Kulla.
Ai u shpreh se Bashkimi Evropian nuk mund ta konsolidojë fuqinë e tij ushtarake pa bashkëpunimin me SHBA-në.
“BE-ja pa Amerikën është si ‘pa breg’. Tri ushtritë më të mëdha të NATO-s – SHBA-ja, Turqia dhe Britania e Madhe – nuk janë pjesë e Bashkimit Evropian. Trendi për ta konsoliduar fuqinë ushtarake dhe ekonomike të aleancës dhe të BE-së kalon domosdoshmërisht nga marrëdhëniet e mira me Shtetet e Bashkuara”, deklaroi ai.
Sipas Kullës, rritja e shpenzimeve për mbrojtje nuk duhet parë si luks, sidomos pas zhvillimeve të fundit në Lindjen e Mesme.
“Ai 5 për qind i PBB-së për mbrojtje nuk do të thotë se duhet të na pëlqejë çdo gjë që bën Trump apo mënyra e tij e komunikimit. Aleancat ndërtohen mbi interesa dhe mbi të ardhmen. Lufta në Iran tregoi se paratë e shpenzuara për sigurinë nuk janë luks. Edhe për Kosovën dhe Serbinë kemi diskutuar shpesh se investimet në siguri janë të domosdoshme”, u shpreh ai.
Kulla vlerësoi se një nga sfidat kryesore të Bashkimit Evropian mbetet mungesa e lidershipit të fortë.
“Sot Evropa ka një problem me lidershipin. Trump preferon të flasë me Erdoganin sepse ai është një lider që atë që thotë e bën. Bashkimi Evropian nuk ka një lider të tillë. Për të pasur një BE të fortë duhet lidership i fortë, investime në siguri dhe një aleancë strategjike me SHBA-në”, tha Kulla./teve1.info/
