Instituti Kombëtar i Shëndetësisë Publike të Kosovës (IKShPK) ka bërë thirrje për kujdes të shtuar gjatë ditëve me temperatura të larta.
Ata kanë paralajmëruar rrezikun në rritje për dehidrim dhe probleme të tjera shëndetësore, veçanërisht te grupet më të ndjeshme si fëmijët, të moshuarit dhe personat me sëmundje kronike.
Për të përballuar më lehtë vapën, IKSHPK-ja rekomandon që qytetarët të ndjekin disa këshilla të thjeshta, por efektive:
Vishni rroba të lehta, të lirshme dhe nga pambuku, për të ndihmuar trupin të marrë frymë dhe të mos mbingarkohet nga nxehtësia;
Bëni dush ose banjë të freskët gjatë ditës, për të ulur temperaturën trupore;
Pini ujë rregullisht, të paktën 1 gotë çdo orë, duke arritur 2–3 litra në ditë, edhe nëse nuk ndjeni etje.
Moti gjatë kësaj jave pritet të jetë shumë i nxehtë. Temperaturat pritet të shkojnë deri në 36 gradë Celsius.
