Instituti Kombëtar i Shëndetësisë Publike të Kosovës ka njoftuar qytetarët se është duke u bërë monitorimi dhe përcjellja në vazhdimësi e cilësisë së ujit të Liqenit akumulues të Badovcit, të destinuar për pije.
IKSHPK-ja në një postim në Facebook, ka thënë se analizat e fundit laboratorike tregojnë për rënien e vlerave referente të manganit në ujin e liqenit.
Në njoftim është thënë se nuk ka vend për panik
“Analizat e fundit laboratorike tregojnë për rënie të vlerave referente të manganit në ujin e liqenit dhe në rrjetin shpërndarës, por që, ende nuk janë arritur vlerat sipas standardeve të parapara në Udhëzimin administrativ nr. 10/2021 – Cilësia e Ujit për konsum nga njeriu”, thuhet në njoftim.
Tutje, IKSHPK-ja ka bërë të ditur se uji mund të përdoret për pastrim, mirëmbajtje të higjienës dhe ambienteve të banimit si dhe për nevoja të tjera, përveç përgatitjes së ushqimit, sepse vlimi i ujit nuk e zvogëlon sasinë e manganit.
“Ekipet e IKSHPK-së janë në terren 24/7 dhe po bëhen çdo ditë analiza fiziko-kimike të ujit të prodhuar në Fabrikën që furnizohet nga Liqeni akumulues i Badovcit dhe qytetarët do të njoftohen me kohë për normalizimin e parametrave referent të ujit të pijshëm”,thuhet në njoftim.
Aktualisht uji nga Liqeni i Badovcit është i pa përdorshum për pije.
