Instituti Kombëtar i Shëndetësisë Publike të Kosovës ka bërë të ditur se nga 16 prilli deri më 1 qershor 2026 janë regjistruar 25 raste të konfirmuara me fruth në nivel vendi.
Sipas të dhënave të publikuara nga instituti, vetëm gjatë javës së fundit janë evidentuar pesë raste të reja të kësaj sëmundjeje ngjitëse.
Numri më i madh i rasteve është raportuar në Ferizaj me tetë të infektuar, pasuar nga Prishtina me gjashtë raste dhe Kaçaniku me pesë. Ndërkohë, raste të veçuara janë konfirmuar edhe në Deçan, Fushë-Kosovë, Gjilan, Lipjan, Obiliq dhe Shtime.
Autoritetet shëndetësore kanë apeluar te qytetarët që të kërkojnë ndihmë mjekësore menjëherë nëse paraqesin simptoma karakteristike të fruthit, si temperaturë të lartë, skuqje të lëkurës, kollë apo rrufë.
IKShPK ka theksuar se për shkak të shkallës së lartë të përhapjes së sëmundjes, është e rëndësishme që prindërit dhe kujdestarët të kontrollojnë nëse fëmijët e tyre janë vaksinuar sipas kalendarit të imunizimit.
Sipas institutit, vaksinimi mbetet mënyra më e sigurt dhe më efektive për mbrojtjen nga fruthi, parandalimin e përhapjes së tij në komunitet dhe ruajtjen e shëndetit publik.
