Instituti i Kosovës për Drejtësi (IKD) ka reaguar ashpër ndaj qëndrimeve të Qeverisë në detyrë lidhur me aktgjykimin e fundit të Gjykatës Supreme, që shpalli të paligjshëm dhe shfuqizoi Udhëzimin Administrativ (MFPT) nr. 01/2025 për pajisjet fiskale dhe softuerët elektronikë.
IKD e cilëson “krejtësisht të papranueshëm” reagimin e Qeverisë, duke thënë se kundërshtimi publik i një vendimi të instancës më të lartë gjyqësore përbën jo vetëm ndërhyrje në pavarësinë e gjyqësorit, por edhe shkelje flagrante të parimit të ndarjes së pushteteve.
“Ky veprim cenon integritetin e gjyqësorit dhe nxit mosbesim institucional”, thuhet në reagim.
IKD vlerëson se qasja e ministrit në detyrë, Hekuran Murati, i cili ka përmendur me emër gjyqtarët e Gjykatës Supreme, është veçanërisht e rrezikshme.
“Kjo jo vetëm që cenon integritetin e sistemit gjyqësor, por përbën rrezik edhe për sigurinë individuale të gjyqtarëve të përmendur”, thuhet tutje në reagim.
Sipas IKD-së, deklaratat e zyrtarëve të Qeverisë përbëjnë presion të panevojshëm mbi gjyqësorin dhe përpjekje për ta delegjitimuar publikisht.
“Besimi në sistemin gjyqësor ndërtohet përmes respektimit të vendimeve të tij, jo përmes presionit dhe deklaratave politike”, nënvizon IKD.
IKD thotë se vendimi i djeshëm i Gjykatës Supreme krijon precedent të rëndësishëm për ndarjen e pushteteve dhe për vendimmarrjen administrative pa ndikim politik.
“Gjykata ka vendosur me të drejtë se një udhëzim administrativ i nxjerrë nga një person që ushtron njëkohësisht detyrën e deputetit dhe të ministrit është në kundërshtim me Kushtetutën”, thuhet në komunikatë.
Instituti fton të gjithë përfaqësuesit institucionalë që të përmbahen nga deklarata që ulin autoritetin e gjykatave dhe të tregojnë respekt ndaj vendimeve gjyqësore, si themel i sundimit të ligjit dhe sigurisë juridike.
