Instituti i Kosovës për Drejtësi (IKD) ka reaguar ndaj vendimit të Këshillit Prokurorial të Kosovës për shkarkimin e Besim Kelmendit nga pozita e ushtruesit të detyrës së Kryeprokurorit të Shtetit, duke e cilësuar atë të paligjshëm, arbitrar dhe abuziv.
Sipas IKD-së, vendimi është marrë nga vetëm pesë anëtarë të KPK-së, pasi pesë të tjerë kanë lëshuar mbledhjen, gjë që sipas institutit nuk e plotëson kuorumin minimal prej gjashtë anëtarësh për vendimmarrje. IKD thotë se ky veprim është përpjekje për të ruajtur “përbërjen korporatiste” dhe kontrollin e sistemit prokurorial nga një grup i vjetër interesi.
Instituti ka rikujtuar edhe paralajmërimin e BE-së, sipas të cilit çdo tentativë për të manipuluar përbërjen e KPK-së ose për të zëvendësuar U.D. Kryeprokurorin para hyrjes në fuqi të ligjit të ri, do të konsiderohet pengim i qëllimshëm i reformës në drejtësi.
IKD thekson se një pjesë e anëtarëve që morën vendimin e sotëm e përfundojnë mandatin në janar të vitit 2026, ndërsa përbërja e KPK-së do të reduktohet gradualisht në shtatë anëtarë sipas ligjit të ri.
“Përderisa me këtë përbërje të KPK, kuorumi minimal i vendimmarrjes është të paktën gjashtë (6) anëtarë, pa të cilët nuk mund të mbahet mbledhja, mbajta e takimit dhe nxjerrja e vendimit për shkarkimin dhe caktimin e ri të U.D. Kryeprokurorit, në mungesë të kuorumit, është një vendim abuziv i një pjese të anëtarëve të KPK, që nuk kanë shumicën e nevojshme për mbajtjen e takimeve të KPK dhe aq më pak për vendimmarrje”, thuhet në reagim. /teve1.info/
