Ai tha se përveç monitorimit të këtij procesi IKD-ja ka bërë edhe vlerësimin e kritereve të përcaktuara me rregullore.
Sipas Thaqit, Këshilli Prokurorial i Kosovës ka treguar transparencë sa i përket procesit për përzgjedhjes dhe intervistimit të kandidatëve dhe se kjo praktikë sipas tij, duhet të praktikohet edhe në proceset tjera.
“Këshilli Prokurorial i Kosovës fillimisht ka treguar një transparencë sa i përket këtij procesi i ka lejuar shoqërisë civilë të bëjë monitorimin e plotë të këtij procesi. Pra një monitorim të plotë dhe objektiv dhe më pastaj kemi pasur rastin të përcjellim edhe procesin e intervistimit të kandidatëve e poashtu këto intervista janë transmetuar në publik dhe kjo qasje është për t’u përshëndetur dhe është mirë që praktikat e tilla të përcillen edhe në proceset e tjera”, tha ai.
Thaqi theksoi se Instituti i Kosovës për Drejtësi, bashkë me dy organizata të tjera joqeveritare, e ka bërë monitorimin e plotë të procesit të zgjedhjes së kryeprokurorit të shtetit dhe njëkohësisht e ka bërë edhe vlerësimin e kritereve të cilat janë të të përcaktuara me rregulloren.
Sipas tij, pjesë e raportit analitik kanë qenë koncept dokumentet, të cilat kanë qenë të publikuara në ueb faqen zyrtare të KPK- së, të cilat kanë qenë të qasshme për të gjithë.
Teksa ka treguar se si shoqëri civile kanë vërejtur se vlerësimi nga paneli vlerësues nuk ka përkuar aspak me koncept dokumentin i cili siç tha ai në bazë të rregullores vlerësohet me 30 pikë.
“Mospërputhja qëndron në faktin se bazuar në koncept dokumentin, pra bazuar në profesionalizmin e shfaqur të kandidatëve si dhe njohurive dhe shkathësive të tyre të shfaqura gjatë intervistimit nuk përputhet me vlerësimin i cili ka rezultuar nga ana e panelit vlerësues”, tha ai .
Kurse ka shtuar se IKD dhe dy organizatat tjera janë në dijeni të faktit se paneli vlerësues ka një liri dhe diskrecion me rastin e vlerësimit të këtyre kandidatëve megjithatë sipas tij, poentimi i cili i është bërë kandidatëve nuk përkon aspak me njohuritë e shfaqura gjatë procesit të intervistimit.
