Ibrahimi tha se janë mbi 35 milionë euro të cilat u janë marrë komunave nga këto kontrata kolektive.
“Na është premtuar që do të gjendet një zgjidhje… pastaj mësimdhënësit përmes përmbaruesve filluan t’i fitojnë rastet dhe niveli qendror i ka ekzekutuar të gjitha vendimet ekzekutive të përmbaruesve dhe ju ka marrë komunave në mënyrë të drejtpërdrejtë mjetet financiare dhe një bazë të llogarive tona janë mbi 35 milionë euro të cilat ju kanë marrë komunave nga kontratat kolektive. Neve si asociacion, as kryetarët e komunave, as komunat nuk janë kundër kontratave kolektive, por ne jemi kundër detyrimeve financiare, marrjes së mjeteve financiare të komunave”, tha ai.
Tutje gjatë emisionit “Ditari”, Ibrahimi theksoi se vazhdimisht Asociacioni i Komunave ka kërkuar që barrën financare ta marrin ministritë, e jo nga komunat.
“Kur ishte nënshkruar marrëveshja për kontrata kolektive nga niveli qendror ne si asociacion kemi reaguar. Kërkesa jonë ka qenë që barrën financiare të marrin ministritë të cilat janë nënshkruese të kontratave kolektive sepse këto kontrata janë nënshkruar nga ministritë përkatëse, mirëpo barra financiare u ka rënë komunave”, deklaroi ai./Teve1.info/
