Drejtori i Asociacionit të Komunave të Kosovës, Sazan Ibrahimi ka folur për pezullimin e 37.5 milionë euro të komunave.
Ibrahimi ka thënë se tendenca e Qeverisë në fillim ka qenë që t’ua marrë këto mjete financiare komunave.
Sipas tij, aktualisht këto mjete nuk mund t’i shfrytëzojë as Qeveria dhe as komunat.
“Këto 37.5 milionë euro janë pezull dhe as Qeveria nuk mund t’i shfrytëzojë sepse nëse i shfrytëzon atëherë shkel ligjin, mirëpo as komunat nuk mund t’i shfrytëzojnë. Tendenca e Qeverisë në fillim ka qenë që t’ia ndalë të gjitha këto mjete komunave. Këto mjete janë të grumbulluara para vitit 2022. Ne si asociacion e kemi ngritur këtë shqetësim”, ka deklaruar ai në emisionin “Ditari” në Tëvë1.
Po ashtu, Ibrahimi thotë se AKK-ja kërkon që këto 37.5 milionë euro t’i barten komunave.
“Vullneti i deputetëve ka qenë që mos t’i merren mjetet financiare komunave, tash a mund të konsiderohet kjo si gabim teknik, apo si mund të konsiderohet mirëpo ne kërkojmë që këto mjete ti bartën komunave sepse kuvendet komunale kanë marrë vendim që të shfrytëzohen këto mjete. Pas dërgimit të këtyre kërkesave në nivelin qendror ka filluar që të kthehen përgjigjet negativisht, se mjetet nuk mund të barten para vitit 2021 edhe pse ato janë të hyra vetanake”, tha ai.
