Ai tha se përshkallëzim i situatës nuk është qëllim i institucioneve të Kosovës, të cilat sipas tij, po kërkojnë zbatimin e marrëveshjeve të Brukselit.
“Kryeministri Kurti nuk po bën veprime të njëanshme. Ai po e kryen detyrën vet të kryeministrit, është një marrëveshje e nënshkruar nga dy palët, edhe nga pala serbe edhe nga pala shqiptare në Bruksel në vitin 2011 ku ka të bëjë me targat dhe ajo po zbatohet”, tha ai në Tëvë1.
Sipas Ibishit, tendencat serbe janë që të përshkallëzojnë apo tensionojnë situatën në veri.
“Përshkallëzimi mund të vijë vetëm nga pala serbe, assesi nga pala kosovare. Pala serbe po mendoj nga shteti fqinjë, në këtë rast Serbia me një estabilishment tani të ri qeveritar në krye të së cilës çdoherë qëndron një lider një president serb i cili i ka të gjitha ato pushtet dhe fatkeqësisht që po reflekton nga koha e Millosheviqit”, shtoi Ibishi në emisionin “Ditari”.
Sipas njohësit të sigurisë, veprimi i Qeverisë së Kosovës por edhe i sektorit të sigurisë është jashtëzakonisht i mirë dhe është bërë zëvendësimi me kohë.
Ndërkohë lidhur me këtë situatë edhe Sekretari i Përgjithshëm i NATO-s, Jens Stoltenberg të hënën ka zhvilluar biseda telefonike me kryeministrin e Kosovës, Albin Kurti dhe me presidentin serb, Aleksandar Vuçiq.
Përmes një postimi në Twitter, ai bëri të ditur se u ka bërë thirrje atyre për përmbajtje nga veprimet e njëanshme që mund të shkaktojnë përshkallëzim.
Në fundjavën që lam pas, përfaqësuesit e serbëve ofruan dorëheqjen nga institucionet e nivelit lokal në Kosovë, nga Gjyqësori, Policia, si dhe nga Qeveria e Kuvendi i Kosovës. Këto largime ndodhën pasi Qeveria e Kosovës më 1 nëntor nisi zbatimin e planit prej tri fazash për riregjistrimin e makinave me targa të lëshuara nga Serbia në ato RKS (Republika e Kosovës). /Teve1.info/
