Gjitha këto varre janë të civilëve që u masakruan nga forcat serbe më 27 prill të vitit 1999 në Mejë të Gjakovës.
Ky ishte njëri ndër krimet më mizore që Serbia kreu në Kosovë gjatë luftës.
Forcat ushtarake, policore e paramilitare serbe privoi nga jeta 377 civilë, disa prej tyre rezultojnë ende të zhdukur.
Beteja e drejtësisë për këtë masakër nisi të hënën në Gjykatën Themelore në Prishtinë për 53 të akuzuar, duke përfshirë 5 planifikues të masakrës, 11 ekzekutorë dhe 37 të pandehur që dyshohet se i kanë kryer veprat brutale.
Nisjen e këtij gjyqi që po zhvillohet në mungesë e kanë pritur me emocione familjarët e të vrarëve në Mejë.
Lush Krasniqi i ka tre familjarë të vrarë në këtë masakër. Dhimbja për ta i rëndon mbi supe njësoj tash më shumë se dy dekada.
Mirëpo shprehet pesimist se mund të ketë dënim meritor për të pandehurit në këtë gjykim.
Nisjen e gjyqit për masakrën e Mejës e kanë pritur me gëzim edhe familja e Vebi Dervishit i ka pesë anëtarë të familjes të vrarë.
Edhe ky vlerëson se nuk do te ketë sukses në gjykimin e tyre, por që shpreh vullnetin për te dhënë edhe dëshmi.
Prokuroria Speciale kishte ngritur aktakuzë për këtë masakër në vitin 2023.
