Personi që u plagos mbrëmë nga të shtënat me armë zjarri pranë një pike karburanti në rrugën Gjilan–Kamenicë i është nënshtruar ndërhyrjes kirurgjike në Qendrën Klinike Universitare të Kosovës (QKUK).
Sipas njoftimit paraprak, pacienti fillimisht është pranuar në Qendrën Emergjente, e më pas është dërguar në sallën e operacionit. Në ndërhyrjen kirurgjike kanë qenë të përfshira ekipet e Ortopedisë, Kirurgjisë Vaskulare dhe Anestezionit.
Pas operacionit, ai është transferuar në Njësinë e Mjekimit Intensiv Qendror (MIQ), ku po vazhdon të marrë trajtim të specializuar dhe mbikëqyrje të vazhdueshme mjekësore.
Lidhur me gjendjen shëndetësore të pacientit, shefi i Mjekimit Intensiv Qendror në QKUK, Shaqir Uka, ka konfirmuar për Tëvë1 se gjendja e tij vazhdon të jetë e rëndë, por parametrat vital janë aktualisht stabilë.
“Pacienti vazhdon të marrë tretmanin mjekësor në Mjekimin Intensiv. Gjendja e përgjithshme mbetet e rëndë, edhe pse parametrat vital për momentin janë stabilë”, ka deklaruar Uka.
