Kryetari i Dritës, Valon Murseli ka bërë një reagim të hënën në lidhje me çmimin “ylli i javës” të cilin e ndanë FFK-ja, pas përfundimit të çdo xhiroje në Superligën e Kosovës.
Murseli nëpërmjet një postimi në Facebook, ka shkruar se është për t’u habitur se si asnjë lojtar i Dritës nuk e ka marrë këtë çmim për më shumë se një vit. Ai ka thënë se është e papranueshme një qasje e tillë, të cilën e ka quajtur tendencioze nga ana e zyrtarëve të FFK-së.
“Më shumë se një vit sipas Federatës së futbollit të Kosovës FC DRITA nuk ka ‘yje’. Është e papranueshme një qasje e tillë kaq tendencioze e zyrtarëve të FFK-së ndaj lojtarëve tanë. Kemi zhvilluar aq shumë ndeshje, shumë prej tyre ndeshje derbi ku rëndom në ligat më të forta ylli i javës nxirret nga ndeshjet derbi dhe zyrtarët e FFK-së nuk kanë ‘yje’ për t’i dhënë lojtarëve të FC DRITA. Po e shohim të rrugës që ti lirojmë nga presioni ata ‘zyrtarë’ të FFK-së që tash e tutje ashtu siç nuk i kanë konsideruar asnjëherë lojtarët tanë, mos ti konsiderojnë as në vazhdim të kampionatit sepse ‘ylli juaj nuk i bënë as më shumë e as më pak yje lojtarët tanë. Ata janë YJE në momentin që bartin fanellën e DRITËS”, ka shkruar Murseli në Facebook, ku postimit të tij ia ka bashkëngjitur një fotografi të skuadrës së Dritës.
