Një person ka mbetur i lënduar si pasojë e një aksidenti mes dy veturave mëngjesin e sotëm në fshatin Makoc të Prishtinës.
Lajmin për tëvë1.info e ka konfirmuar zëdhënësja e policisë për rajonin e Prishtinës, Flora Ahmeti e cila tha se viktima është dërguar për tretman mjekësor.
Policia ka bërë të ditur se me rastin po merret njësiti i trafikut rajonal.
“Sot rreth orës 08:00 kemi pranuar informatën se në fshatin Makoc të Prishtinës, ka ndodhur një aksident trafiku me lëndime. Në këtë aksident kanë qenë të përfshira dy automjete në lëvizje. Si pasojë e aksidentit është lënduar një person i cili është dërguar për tretman mjekësor. Me rastin po merret njësiti i trafikut rajonal”, ka deklaruar Ahmeti.
Për gjendjen e të aksidentuarit, për tëvë1.info ka folur drejtori i emergjencës në QKUK, Naser Syla, i cili tha se gjendja e tij është e rëndë.
“Po, është duke u trajtuar tek ne. Gjendja e rëndë dhe jo stabile. Po kryhen ekzaminimet e nevojshme. Disa duhet të përsëriten dhe më pas transferohet në Mjekimin Intensiv Qendror”, deklaroi ai./teve1.info/
