rokuroria Themelore në Prizren ka paraqitur në Gjykatën Themelore kërkesë për caktimin e masës së paraburgimit ndaj të pandehurit E.R., i cili dyshohet për kryerjen e disa veprave penale. Sipas Prokurorisë, kërkesa është bërë për shkak të dyshimit të bazuar për kryerjen e veprave penale dhe ekzistimit të kushteve ligjore për caktimin e kësaj mase.
Në njoftim thuhet se E.R. ka qenë në kërkim mbi bazën e dy urdhërarresteve aktive, ndërsa ndaj tij kanë qenë të lëshuara edhe letër-rreshtim vendor dhe ndërkombëtar nga gjykata kompetente, me kërkesë të Prokurorisë.
Kërkesa për paraburgim lidhet me procedurat penale që po zhvillohen ndaj tij për veprat penale “Detyrimi”, “Privimi i kundërligjshëm i lirisë” dhe “Frikësimi gjatë procedurës penale në vazhdimësi”.
Sipas Prokurorisë, ndaj E.R. janë duke u zhvilluar edhe procedura të tjera penale në Departamentin për Krime të Rënda, Departamentin e Përgjithshëm të Prokurorisë Themelore në Prizren, si dhe në Prokurorinë Speciale të Republikës së Kosovës. Këto procedura lidhen me dyshimet për “Vrasje të rëndë e mbetur në tentativë”, “Mbajtje në pronësi, kontroll ose posedim të paautorizuar të armëve”, si dhe “Kanosje” ndaj zyrtarëve shtetërorë.
“Prokuroria vlerëson se në këtë fazë të procedurës penale ekzistojnë kushtet ligjore për caktimin e masës së paraburgimit, duke marrë parasysh se i pandehuri ka qenë për një kohë të gjatë i pakapshëm për organet e drejtësisë, ka qenë subjekt i urdhërarresteve dhe letër-rreshtimit vendor e ndërkombëtar, si dhe ekziston rreziku i ikjes dhe i pengimit të zhvillimit të procedurës penale”, thuhet në njoftimin e Prokurorisë Themelore në Prizren.
Prokuroria ka theksuar se mbetet e përkushtuar në luftimin e kriminalitetit, forcimin e sundimit të ligjit dhe sigurimin që çdo person i dyshuar për kryerjen e veprave penale të përballet me organet e drejtësisë.
