Synimin e kishin që t’i merrnin 60% të votave.
Por Lëvizja Vetëvendosje, në zgjedhjet e 7 qershorit, nuk arriti të rritet edhe për 9%.
Madje, nga 28 dhjetori ky subjekt i humbi mbi 134 mijë vota.
Kjo u bë e ditur me publikimin e rezultateve preliminare nga KQZ, ku VV doli bindshëm e para me 42.91% të votave të fituara.
E profesori universitar, Mazllum Baraliu tregon arsyet që sipas tij ndikuan që VV të humbas vota.
“Kjo është vërejtje serioze për Vetëvendosjen por edhe për partit tjera , që të mos kalkulojë në asnjë mënyrë por as mos të përpiqet të bëjë një përpjekje të tillë tani në rastin e formimit të institucioneve të reja veçanërisht zgjedhjes së presidentit duhet të bashkëpunojë, të gjejë një modul të zgjidhjes”, ka thënë Baraliu.
Sipas Baraliut, partia fituese e zgjedhjeve të fundit, mori një mesazh të qartë nga qytetarët.
“Mesazhi është i qartë që Vetëvendosje dhe koalicioni i saj si fitues të zgjedhjeve të kaluara një pas një kësaj radhe duhet të kenë kujdes më tepër sepse kanë marrë leksion, e leksioni ka të bëjë me abstenimin nga zgjedhjet me daljen të numrit jashtëzakonisht të vogël”, ka thënë tutje Baraliu.
E sipas analistit politik, Afrim Kasolli, ky rezultat është tregues së VV duhet të tregohet bashkëpunuese me subjektet e tjera politike për formimin e institucioneve.
“Në këtë drejtim, ky subjekt ka marrë një goditje serioze nga qytetarët e Kosovës sepse nuk e ka pranuar vizionin dhe botëkuptimin e kësaj lëvizje se vetëm një subjekt që kontrollon të gjitha pushtet mund të jetë garanci e duhur për stabilitetin politik”, u shpreh Kasolli.
Zgjedhjet që u mbajtën të dielën ishin zgjedhjet e treta parlamentare që u mbajtën për më pak se 16 muaj në Kosovë.
