I është dhënë sot lamtumira e fundit Laurent Krasniqit, i cili humbi jetën tragjikisht të mërkurën mbrëma, pas një aksidenti të rëndë me motoçikletë.
Ceremonia e varrimit u zhvillua në Llukar të Prishtinës, vendlindjen e tij, ku familjarë, miq, kolegë dhe qytetarë të shumtë u mblodhën për t’i dhënë nderimet e fundit të riut.
Në mesin e të pranishmëve ishin edhe figura dhe personalitete të njohura publike, të cilët shprehën ngushëllimet e tyre për familjen Krasniqi dhe ndanë dhimbjen me të afërmit e të ndjerit.
Ndryshe, aksidenti tragjik ndodhi të mërkurën rreth orës 20:17 në Llukar, ku një veturë u përplas me motoçikletën që drejtonte Krasniqi.
Ai u dërgua për trajtim në Emergjencën e QKUK-së, por mjeku konstatoi vdekjen e tij.
Pas aksidentit, me vendim të prokurorit, trupi i pajetë u dërgua në Institutin e Mjekësisë Ligjore për obduksion.
Ndërkohë, shoferi i veturës së përfshirë në aksident u arrestua dhe, me urdhër të prokurorit, u dërgua në mbajtje.
Hetimet për zbardhjen e plotë të rrethanave të aksidentit janë duke vazhduar.
Laurent Krasniqi kishte punuar për disa vite si kameraman në disa prej mediave në Kosovë, përfshirë Tëvë1, T7 dhe TV Dukagjini./teve1.info/
