Bilall Kqiku, personi që dyshohej për veprën penale “vrasje e rëndë”, ka ndërruar jetë në Qendrën Klinike Universitare të Kosovës (QKUK), pasi kishte rënë nga ballkoni i banesës së tij gjatë përpjekjes për t’i shpëtuar arrestimit nga Policia e Kosovës, kështu kanë bërë të ditur burimet e televizionit Tëvë1 .
Shefi i Klinikës Intensive në QKUK, Shaqir Uka, ka konfirmuar se pacienti që kishte pësuar lëndime të rënda nuk ka arritur t’u mbijetojë plagëve.
“Po, fatkeqësisht pacienti që ju i referoheni nuk ka arrit me ju përballue lëndimeve që ka pësue dhe i njëjti ka ndërrue jetë”, ka deklaruar Uka për Tëvë1.
Kqiku fillimisht ishte dërguar në Emergjencën e QKUK-së, për t’u transferuar më pas në repartin e Mjekimit Intensiv, ku nuk kishte arritur të mbijetojë plagëve të marra.
Sipas njoftimit zyrtar të Policisë, ndaj Kqikut kishte urdhër-arrest vendor dhe ndërkombëtar, ndërsa ai ishte në kërkim lidhur me një rast vrasjeje në kryeqytet.
Gjatë kontrollit në banesën e tij, policia kishte sekuestruar një sasi të konsiderueshme të substancave narkotike dhe pajisjeve të ndërlidhura me veprimtari kriminale, përfshirë: 6 kg e 172.6 gramë marihuanë, 38.3 gramë kokainë, 0.9 gramë tusi, 0.4 gramë ekstazi,Një peshore digjitale,Një karikator dhe këllëf i armës.
Rreth 1,000 euro, si dhe shuma të tjera të vogla në valutë të huaj: 20 franga zvicerane, 110 denarë të Maqedonisë së Veriut dhe 50 dinarë serbë.
Tëvë1 ka provuar të marrë një qëndrim nga Policia e Kosovës lidhur me rastin, mirëpo deri në publikimin e këtij lajmi nuk ka marrë përgjigje.
