Hysni Gucati u lirua të martën nga Gjykata Speciale. Ai u kthye në Kosovë, fillimisht në zyret e EULEX-it, e më pas u mirëprit nga qindra qytetarë në fshatin e tij në Morinë të Skenderajt.
Kjo është përshëndetja e tij e parë në liri.
Hysni Gucati nga selia e EULEX-it po niset drejt vendlindjes.
E në fshatin Morinë të Skenderajt të martën kishte festë.
Andaj flamujt kombëtar e ata me stemën e Ushtrisë Çlirimtare të Kosovës valonin gati në secilën shtëpi.
Gjitha këto përgatitje u bën për Hysni Gucatin, i cili me gëzim u drejtua për në shtëpinë e tij në Morinë të Skenderajt.
E për ta mirëpritur ish kryetarin e OVL-UÇK-së, bashkëfshatarët dolën në hyrje të fshatit.
Së bashku u nisën për tek shtëpia ku po e priste familja e ngushtë të sapo liruarin nga Gjykata Speciale.
Për të ëmën e Hysni Gucatit, kjo ishte dita më e lumtur. Por, ajo në këtë ditë pati edhe një lutje.
‘’Kurrë ma gëzueshëm s’jam kanë. InshAllah edhe ata vijnë sa ma shpejt. Për nanë e babë, zemra gjithë është njëjtë për evlad.
Gëzimin me familjarët erdhën ta ndajnë edhe qindra persona që erdhën për ta vizituar Gucatin.
Megjithatë ardhja e tij gjatë së martës sipas familjarëve ishte e papritur.
“Ne kemi qenë të përgatitur për nesër për ardhjen e tij, sot na ka ndodhë paritë mirëpo sido që të jetë ai është kthy i lirë në gjirin familjar, të miqve e shokëve dhe krejt Kosovës”, tha Musli Gucati, djali i Hysni Gucatit.
Edhe djali i axhës së Gucatit shpreh emocionet që ndjeu me ardhjen e Hysniut.
“I mangët është lirimi i tij kur i ka shokët tjerë atje. Po deshtë Zoti edhe për ta sa ma herët bëhet lirimi i tyre”, tha Avdi Gucati, djali i axhës së Hysniut.
Për ta vizituar, në odën e Gucatit erdhën ushtruesi i detyrës së kryetarit të OVL-UÇK-së, Faton Klinaku me ish bashkë luftëtarë, e të mbijetuar të masakrave anë e mbanë Kosovës.
“Gëzim më të madh s’kemi pas e pa drejtësi po na i mbajnë tanë, e ishalla ju ka çelë rrugën ky e tjerët vijnë tanë ren”, u shpreh Milazim Thaçi, i mbijetuar i masakrës së Izbicës.
Dhomat e Specializuara në Hagë njoftuan të martën se kanë modifikuar dënimin ndaj ish-kreut të Organizatës së Veteranëve të Ushtrisë Çlirimtare të Kosovës, Hysni Gucati, duke i mundësuar atij lirimin nga burgu, nën disa kushte.
