Ka dështuar për herët të dytë brenda dy ditëve seanca në Kuvendin Komunal të Gjilanit për votimin e buxhetit të kësaj komune.
Kryetari i kësaj komune , Alban Hyseni ka thënë se kryesuesi i Kuvendit, Kushtrim Kadriu, ka refuzuar dërgimin e ftesës së asambleistëve për thirrje të seancës.
“Deri sot kur është mbajtur kjo seancë urgjente, kryesuesi i Kuvendit nuk e ka dërguar ftesën te asambleistët”, tha Hyseni në konferencën për media pas mbledhjes.
Ai ka thënë se kryesuesi i Kuvendit Komunal është duke bërë elemente të keqpërdorimit të detyrës zyrtare.
“Dua të paralajmërojë se këto veprime të opozitës së bashkuar LDK-së, PDK-së, Vatra dhe Lista Serbe që vazhdimisht e bojkotojnë Kuvendin dhe buxhetin, janë një lloj rrëshqitje drejt elementeve të veprës penale të keqpërdorimit të detyrës zyrtare. Kryesuesi i Kuvendit që në këtë rast është një lloj vegle -instrumenti i LDK dhe PDK-së është duke dhënë elemente të cilat e përbëjnë elemente të keqpërdorimit të detyrës zyrtare sipas Kodit Penal”, ka thënë Hyseni, raporton teve1.info
Duke folur për procedurat ligjore të buxhetit ai ka thënë se janë ndjekur të gjitha hapat duke përfshirë edhe organizmin e dëgjimeve publike.
Hyseni ka thënë Komiteti për Finaca 7 muaj nuk e ka miratuar buxhetin që të hyjë në rend dite.
