Kryetari i Komunës së Gjilanit, Alban Hyseni, ka reaguar ndaj zhvillimit të stërvitjeve ushtarake pranë kufirit me Republikën e Kosovës, në afërsi të Gjilanit, duke i cilësuar ato si shqetësuese dhe provokuese për qytetarët.
Përmes një postimi në Facebook, Hyseni theksoi se prania e forcave ushtarake, mjeteve ajrore dhe aktiviteteve të tilla në zona të banuara krijon ndjenjë pasigurie dhe tension të panevojshëm, duke ndikuar drejtpërdrejt në jetën e përditshme të banorëve.
“Si Kryetar i Komunës së Gjilanit, shpreh shqetësimin tim të thellë për këto zhvillime dhe kërkoj nga institucionet përkatëse vendore dhe ndërkombëtare që të monitorojnë situatën me kujdes dhe të ndërmarrin veprime konkrete për garantimin e sigurisë dhe stabilitetit në rajon”, ka shkruar Hyseni.
Ai shtoi se qytetarët meritojnë qetësi, siguri dhe perspektivë, e jo frikë dhe presion.
Ndërkohë, reagime ka pasur edhe nga Lugina e Preshevës. Kryetari i Këshillit Kombëtar Shqiptar, Enkel Rexhepi, i ka cilësuar të papranueshme stërvitjet ushtarake të Serbisë në territorin e Komunës së Bujanocit, pranë kufirit me Kosovën.
Në një postim të shoqëruar me fotografi të parashutistëve, Rexhepi ka deklaruar se demonstrimi i forcës me helikopterë dhe parashutistë në zona të banuara përbën kërcënim të drejtpërdrejtë për qetësinë dhe sigurinë e qytetarëve shqiptarë.
