Ish-ministri i Jashtëm i Kosovës, Skender Hyseni ka akuzuar opozitën e Kosovës se për situatën që ndodhet vendi kanë faj edhe ata, për shkak sipas tij të përkrahjes gjeneroze dhe kalkulimeve.
Ai ka thënë se nga opozita ishte akuzuar kur ky kishte paralajmëruar se Kurti e Osmani po e konfrontonin Kosovën me gjithë botën.
“Këto ditë, po shof shumë të habitur me të bëmat e binomit Kurti-Osmani. Kishte nga opozita që më akuzonin për “ndotje të diskursit politik”, kur, para gati një viti, paralajmëroja se këta, Kurti dhe Osmani po e konfrontonin Kosovën me gjithë botën. Ja ku jemi sot. Besa këtu jemi edhe me përkrahjen tuaj gjeneroze, dhe kalkulante!Pasojat janë të pariparueshme tashmë. “Lufta” tani bëhet për të menaxhuar dëmet”, ka shkruar Hyseni në Facebook.
Ish-deputeti i LDK-së ka përshëndetur nismën e kryetari të LDK-së, Lumir Abdixhiku i cili ka paralajmëruar hapa dhe takime me akterë vendorë e ndërkombëtarë për gjetjen e një zgjidhje për situatën në veri.
“Sidoqoftë, përshëndes këndelljen e LDK-së! Nëse kjo është e sinqertë?!Lumir, më mirë vonë se kurrë”, ka shkruar Hyseni./teve1.info/
