Hyseni ka shkruar se në koalicionin e parë përveç kryeministrit Kurti e presidentes Osmani, është edhe kryeministri i Malit të Zi, Dritan Abazoviq.
“Vjosa Osmani dhe Albin Kurti me VV-në në Kosovë, njëfarë biçim kryeministri, Abazoviq në Mal të Zi dhe grupi problematik i VV-së në Tiranë janë pjesë konsensusit transnacional ballkanik kundër asociacionit dhe rrjehdimisht kundër marrëveshjes së paqes midis Kosovës dhe Serbisë, përkatësisht midis shqiptarëve dhe serbëve në përgjithësi”, ka shkruar Skender Hyseni.
Teksa në grupin e dytë i ka renditur ShBA-në e vendet e BE-së.
“Në anën tjetër ndërkaq, e gjithë bota demokratike, përfshirë këtu Amerikën, Britaninë e Madhe, Francën, Gjermaninë dhe të gjitha vendet e BE-së, po bënë thirrje pa ekuivoke për themelimin e asociacionit dhe për marrëveshje paqeje midis Kosovës dhe Serbisë, e që në thelb do të ishte paqe midis shqiptarëve dhe serbëve në Ballkan përgjithësisht!”, ka shkruar Hyseni.
Sipas Hysenit koalicioni ku bëjnë pjesë Kurti e Osmani po përpiqet ta instalojë një çmenduri kolektive në Kosovë.
“Binomi Kurti Osmani dhe aleatët e “forte” të tyre, si ky Abazoviqi, “telalli” i Vuçiqit në Mal të Zi dhe grupi i marksistëve të Tiranës janë e keqja më e madhe e Kosovës dhe shqiptarëve sot. Politika e çmendur që udhëhiqet nga ky “bllok” mjeranësh po i rrezikon vet themelet e shtetit të Kosovës. Me veprimet e tyre politike, Kurti e Osmani, po u shërbejnë agjendave politike serbe”, ka shkruar tutje Hyseni.
E sipas Hysenit ShBA-ja e BE-ja po e mbrojnë Kosovën nga politikanët e papërgjegjshëm.
“Kosova dhe populli i saj është janë me fat dhe të bekuar qe megjithate kanë ende përkrahjen e fuqishme të miqëve të saj, SHBA-ve në rend të pare dhe BE-së që po e mbrojnë këtë vend edhe nga politikat e papërgjegjshme të politikanëve të saj. Ne duhet ta deshmojmë që jemi pjesë e konsensusit ndërkombëtar e assesi pjesë e “konsensusit transnacional ballkanik””, ka shkruar Hyseni.
