Kandidati për kryetar të Podujevës nga radhët e Lëvizjes Vetëvendosje, Shpejtim Bulliqi, të martën, në emisionin “Këndi i Debatit” në Tëvë1, ka komentuar një deklaratë të tij të mëhershme që ngjalli debat gjatë përballjes me kandidatin e LDK-së për këtë komunë, Ekrem Hyseni, ku gjatë një emisioni të mëparshëm, Bulliqi i kishte kërkuar Hysenit që të dëshmonte përmes një fotografie se vëllai i tij është invalid lufte.
Bulliqi ka sqaruar qëndrimin e tij, duke theksuar se fjalët i janë keqinterpretuar dhe se sipas tij, kjo deklaratë u interpretua nga Hyseni si mosrespekt ndaj viktimës dhe u përdor për viktimizim politik.
Ndërkohë, të mërkurën në emisionin “Info Nata” në Tëvë1, Ekrem Hyseni i është kundërpërgjigjur Bulliqit, duke thënë se deklarata nuk është keqinterpretuar, por ka treguar se për disa persona gara politike është mbi gjithçka.
“Për dikë mund të jetë viktimizim, sepse për dikë gara politike është mbi të gjitha, por për ne jo. Për ne ka moral në garë. Kur quhet viktimizim, unë po them që populli e kujton atë periudhë me shumë vuajtje dhe dhimbje, sepse nuk është pjesë e historisë që duhet harruar apo trajtuar në mënyrë të lehtë. Kjo deklaratë tregon arrogancë dhe mungesë ekstreme të ndjeshmërisë për një situatë që është pjesë e lavdishme e historisë. Nuk është keqinterpretim diçka që është thënë publikisht dhe është e regjistruar nga kamerat. Ajo ka qenë një deklaratë reale, në një moment kur dikush e sheh garën përtej çdo vlere njerëzore, në një situatë që e ka prekur gjithë vendin”, ka thënë Hyseni.
I pyetur nëse pret një kërkim falje nga Bulliqi, Hyseni është shprehur:
“Unë mendoj që ai që e thotë këtë, dhe që vazhdon ta trajtojë kështu, pa fije respekti dhe pa dhembshuri, nuk tregon as njerëzi e as humanizëm. Situata të tilla kërkojnë trajtim me ndjeshmëri. Por ne kemi parë që deklaratat e tilla kanë vazhduar edhe më tutje. Kjo është diçka për të cilën nuk dua të merrem më tej, sepse vlerësoj që rëndësi ka kush po e thotë”.
