Kryeministri i Kosovës, Albin Kurti ka pritur sot në takim delegacionin përfaqësues të Parlamentit të Belgjikës në Asamblenë Parlamentare të NATO-s.
Pjesë e këtij takimi ishte edhe deputeti i Lëvizjes Vetëvendosje, Driton Hyseni.
Pas takimit Hyseni ka thënë se Belgjika është ndër shtetet e parat që po e thellon avancimin e pozicionit për anëtarësimin e Kosovës në BE dhe NATO.
“Bashkë me kryeministrin Kurti kemi pritur në takim delegacionin e Parlamentit Federal të Belgjikës në Asamblenë Parlamentare të NATO-s. Delegacionit belg kryesuar nga deputeti Theo Francken, i uruam mirëseardhje dhe e falënderuam për mbështetje të vazhdueshme që i jep shtetit të Kosovës. Belgjika është një ndër shtetet e para që e ka pranuar Pavarësinë e Kosovës. Ndër të parat që po e thellon avancimin e pozicionit për anëtarësimin e Kosovës në BE dhe NATO. Nga delegacioni belg e kemi përkrahjen e pa kompromis dhe të vazhdueshme tashmë prej disa viteve”, ka shkruar ai.
