Mbrojtësi i krahut të djathtë, Elseid Hysaj beson se Shqipëria mund të jetë befasia e “Euro 2024”, turne që nis të premten dhe mbahet për një muaj në Gjermani.
Hysaj në konferencën për shtyp të hënën ka thënë se Shqipëria do të tentoj të avancoj nga faza e grupeve dhe se mund të përballet me secilin kundërshtar.
Shqipëria bën pjesë në Grupin B, së bashku me Italinë, Kroacinë dhe Spanjën, kundërshtar që Hysaj i vlerëson lart.
Megjithatë, futbollisti i Lazios ka folur për ndeshjen me Italinë, të cilën Shqipëria e luan të shtunën në Dortmund. Sipas tij, Italia është shumë e fortë pasi në radhët e veta ka lojtarë të mirë, të cilët Hysaj i njeh mirë pasi është përballur me ta në Serie A.
Ai ka thënë se të gjithë futbollistët e Shqipërisë kanë besim dhe janë të vendosur për një paraqitje dinjitoze në këtë ngjarje.
Po ashtu, Hysaj ka shtuar se ekipi ka punuar mirë gjatë këtyre përgatitjeve dhe në miqësoret e luajtura javën e shkuar, Shqipëria tregoi se është në formë të mirë.
Shqipëria zhvilloi ndeshje testuese me Lihtenshtajnin dhe Azerbajxhanin, kundërshtarë që i mposhti me rezultatin 3:0, përkatësisht 3:1.
Për Shqipërinë, kjo do të jetë hera e dytë që paraqitet në Evropian pas vitit 2016 ku u eliminua në fazën e grupeve me një fitore dhe dy humbje pas tri ndeshjeve të luajtura.
