Policia e Kosovës, në bashkëpunim me Doganën e Kosovës, ka parandaluar një rast të dyshuar të kontrabandës në zonën e Korminjanit, ku janë sekuestruar dy automjete dhe mallra të ndryshme pa dokumentacion përcjellës.
Sipas Policisë, rasti ka ndodhur më 30 korrik 2026, gjatë zbatimit të një plani taktik-operacional në rrugët malore të fshatit Korminjan.
Gjatë kontrolleve, zyrtarët policorë kanë identifikuar dy automjete që dyshohet se kishin hyrë në territorin e Kosovës përmes rrugëve ilegale malore nga territori i Serbisë.
Nga kontrolli i automjeteve janë gjetur mallra të ndryshme pa dokumentacion mbi prejardhjen dhe procedurat doganore. Sipas Policisë, mbishkrimet në produkte tregonin se ato ishin prodhim i Serbisë.
Me autorizim të prokurorit kujdestar në Gjilan, automjetet dhe mallrat janë sekuestruar dhe janë dërguar në terminalin doganor për procedurat e mëtejshme.
Policia ka njoftuar se ndaj rastit janë iniciuar procedurat ligjore, ndërsa hetimet do të vazhdojnë në bashkëpunim me Doganën e Kosovës.
