Sot ka hyrë zyrtarisht në fuqi Marrëveshja e Tregtisë së Lirë ndërmjet Republikës së Kosovës dhe shteteve të EFTA-s – Zvicrës, Norvegjisë, Islandës dhe Lihtenshtajnit. Me rastin e hyrjes në fuqi të marrëveshjes, në terminalin e pikës kufitare Dheu i Bardhë është nisur për eksport drejt tregjeve të EFTA-s produkti i parë nga kompania Greenhouse, një shtëpi modulare.
Në këtë ngjarje ka marrë pjesë zëvendësministri i Industrisë, Ndërmarrësisë, Tregtisë dhe Inovacionit, Jeton Mehmeti, i cili uroi mbarësi për bizneset kosovare dhe shprehu pritjen që sa më shumë produkte “Made in Kosova” të gjejnë vend në tregjet e EFTA-s, duke krijuar njëkohësisht partneritete të reja.
Hyrja në fuqi e kësaj marrëveshjeje përbën një hap të rëndësishëm për ekonominë e Kosovës dhe në veçanti për bizneset vendore, pasi krijon mundësi të reja për rritjen e eksporteve të mallrave dhe shërbimeve, zgjerimin e pranisë së produkteve kosovare në këto tregje dhe forcimin e mëtejshëm të bilancit tregtar me shtetet e EFTA-s.
Për produktet industriale, eksportuesit kosovarë do të përfitojnë nga liberalizimi i plotë i tarifave doganore, ndërsa eksportet e një numri të konsiderueshëm të produkteve bujqësore do të përfitojnë nga tarifa të reduktuara ose zero, si dhe nga kuotat preferenciale, sipas kushteve të përcaktuara nga secili shtet i EFTA-s. Marrëveshja krijon gjithashtu mundësi për rritjen e eksportit të shërbimeve, përmes qasjes më të favorshme në treg dhe lehtësirave të parashikuara për këtë sektor.
Ministria e Industrisë, Ndërmarrësisë, Tregtisë dhe Inovacionit do të vazhdojë zbatimin e Marrëveshjes dhe ofrimin e informacioneve dhe sqarimeve konkrete për bizneset, me qëllim që mundësitë e reja tregtare të shfrytëzohen sa më shumë dhe të rriten eksportet drejt tregjeve të EFTA-s.
Islanda, Lihtenshtajni, Norvegjia dhe Zvicra përbëjnë tregje me fuqi të lartë blerëse dhe potencial për produktet dhe shërbimet nga Kosova. Gjatë vitit 2025, Kosova eksportoi mbi 100.4 milionë euro në vendet e EFTA-s, ndërsa importoi rreth 53 milionë euro, duke shënuar bilanc pozitiv tregtar prej 47.4 milionë eurosh në favor të Kosovës. Nga totali i eksporteve në këto tregje, rreth 99.4 milionë euro i përkasin eksporteve drejt Zvicrës.
