Grupi Huthi në Jemen njoftoi të dielën se ka vendosur të “përshkallëzojë” operacionet e tij ushtarake duke nisur fazën e katërt të “bllokadës detare” kundër Izraelit, si përgjigje ndaj gjenocidit të vazhdueshëm në Rripin e Gazës.
Në një deklaratë të publikuar nga forcat e armatosura të grupit, Huthët thanë se kjo fazë përfshin “shënjestrimin e çdo anijeje që i përket një kompanie të lidhur me portet izraelite, pavarësisht nga kombësia apo vendndodhja e saj, nëse është e arritshme nga forcat tona”.
Deklarata u bënte thirrje të gjitha kompanive që të ndërpresin menjëherë çdo lidhje me portet izraelite, duke paralajmëruar se anijet e tyre mund të sulmohen në çdo destinacion që ndodhet brenda rrezes së raketave apo dronëve Huthi.
Grupi gjithashtu iu drejtua vendeve të tjera, duke i kërkuar të ushtrojnë presion ndaj Izraelit për t’i dhënë fund agresionit dhe për të hequr rrethimin ndaj Gazës. “Asnjë njeri i lirë nuk mund të pranojë atë që po ndodh,” thuhet në deklaratë.
Që nga rifillimi i ofensivës izraelite në Gaza në mars, pas një armëpushimi të brishtë dy mujor, Huthitët kanë shtuar sulmet me raketa dhe dronë kundër Izraelit.
Që prej nëntorit 2023, ata kanë shënjestruar gjithashtu anije tregtare në Detin e Kuq, Gjirin e Adenit dhe Detin Arabik, në shenjë mbështetjeje për popullin palestinez në Gaza, ku më shumë se 59,800 persona janë vrarë nga sulmet izraelite.
