Qeveria e Hungarisë, të mërkurën ka njoftuar se po tërhiqet nga Gjykata Ndërkombëtare Penale (ICC).
Masa u njoftua nga një zyrtar i lartë në qeverinë e kryeministrit Viktor Orban disa orë pasi lideri izraelit Benjamin Netanyahu, i cili kërkohet sipas një urdhër-arresti të ICC-së, mbërriti në Hungari për një vizitë shtetërore.
Në nëntor, gjyqtarët e ICC-së thanë se kishte “baza të arsyeshme” që Netanyahu mbante “përgjegjësi penale” për krimet e supozuara të luftës dhe krimet kundër njerëzimit gjatë luftës midis Izraelit dhe Hamasit.
ICC, një gjykatë globale, pjesë e së cilës është edhe Hungaria si një anëtare themeluese e saj, ka autoritetin të ndjekë penalisht të akuzuarit për gjenocid, krime kundër njerëzimit dhe krime lufte.
Hungaria do të jetë vendi i parë i Bashkimit Evropian që do të tërhiqet nga ICC.
Hungaria është një anëtar themelues i ICC, i cili numëron 125 shtete anëtare dhe do të jetë vendi i parë i Bashkimit Evropian që do të tërhiqet prej tij.
ICC ishte një “iniciativë e respektueshme”, tha shefi i shtabit të Orban, Gergely Gulyas për agjencinë shtetërore hungareze të lajmeve MTI, por shtoi se ajo kishte devijuar nga qëllimi i saj fillestar dhe ishte bërë një organ politik.
Ai tha se urdhri i lëshuar kundër Netanyahut ishte i papranueshëm dhe se qeveria nuk dëshiron të marrë pjesë më në punën e gjykatës, ka raportuar BBC.
Hungaria tani duhet t’i dërgojë një njoftim me shkrim Sekretarit të Përgjithshëm të OKB-së për t’u larguar nga traktati, me tërheqjen që hyn në fuqi një vit më vonë, sipas nenit 127 të Statutit të Romës.
Në Evropë, disa vende anëtare të ICC-së thanë se do ta arrestonin liderin izraelit nëse ai shkelte në vendin e tyre, ndërsa të tjerë, si Gjermania, njoftuan se ai nuk do të ndalohej nëse do ta vizitonte.
Shtëpia e Bardhë kishte thënë se SHBA-ja hodhi poshtë vendimin e ICC-së dhe Netanyahu e ka vizituar vendin që nga lëshimi i urdhrit në nëntor. Vizita e tij në Hungari shënon udhëtimin e parë të Netanyahu në Evropë që atëherë.
