Humbja e rëndë e Malishevës, skuadra kosovare në garat evropiane, është humbja më e thellë e një ekipi të Superligës në kupat evropiane.
Të enjten mbrëma, ekipi i ri i Superligës, i themeluar vetëm dhjetë vjet më parë, u shkatërrua në ndeshjen e kthimit të rundit të parë kualifikues për Ligën e Konferencës. Ekipi i Bekim Isufit, që pësoi vetëm 0-1 në Prishtinë, në Islandë u mposht thellë nga Vikinguri, që realizoi plot 8 gola, pesë në pjesën e parë dhe tre të tjerë në të dytën.
Malisheva u kualifikua për gara evropiane si e treta në Superligën e Kosovës. Në skenën kontinentale debutoi vjet, kur u ndal në raundin e parë kualifikues të Ligës së Konferencës. Kishte fituar 1:0 ndaj Buduqnostit të Podgoricës në Prishtinë, por më pas humbi 3:0 në Podgoricë.
Në historinë e re të Ligës së Konferencës, humbja e Malishevës është e dyta për nga pësimi i golave, ndërsa nga ekipet e Kosovës, që marrin pjesë në garat ndërkombëtare që nga viti 2017, kjo është disfata më e rëndë e një ekipi kosovar.
Rekordin për disfatën më të thellë në kupat evropiane e mbante Llapi, që një vit më parë, pësoi 6:0 nga Brondby i Danimarkës.
Derisa për Malishevën ishte humbje rekorde, për Vikingurin ishte fitore rekorde. Asnjë ekip islandez nuk ka fituar kaq thellë në ndeshje evropiane.
