Një i ri 22-vjeçar ka vdekur si pasojë e një aksidenti trafiku që ndodhi pak para mesnatës në rrugën nacionale Mitrovicë–Prishtinë, në territorin e Vushtrrisë.
Sipas informacioneve të para, në aksident janë përfshirë një veturë dhe një motoçikletë. Viktima, që dyshohet të jetë D.M, ishte duke drejtuar motoçikletën dhe nuk ka mundur t’u mbijetojë plagëve të marra.
Policia e Kosovës ka bërë të ditur se në vendin e ngjarjes kanë dalë njësitet përkatëse policore dhe hetuesit e trafikut, të cilët kanë nisur veprimet hetimore për të zbardhur rrethanat e aksidentit.
Me urdhër të prokurorit kompetent, trupi i pajetë është dërguar në Institutin e Mjekësisë Ligjore për kryerjen e obduksionit. Hetimet lidhur me rastin janë në vazhdim.
