Prokuroria Speciale ka hedhur poshtë në tërësi kallëzimin penal të ngritur nga Ministri i Administrimit të Pushtetit Lokal, Elbert Krasniqi, ndaj kryetarit të Prishtinës, Përparim Rama dhe kryeshefit të ndërmarrjes publike lokale “SportMarketing”, Bardh Krasniqi, në lidhje me procedurat e organizimit të tregut veror dhe dimëror “Akull n’verë dhe Verë n’dimër”.
Rama ka thënë se përpjekja e Qeverisë për të diskredituar atmosferën festive që me përkushtim u krijua për festat e fundvitit u rrëzua të enjten përmes një aktvendimi të qartë dhe të argumentuar.
“Këto përpjekje të organizuara përmes instrumenteve të drejtësisë, të shtyra nga motive të qarta politike, nuk po arrijnë të prodhojnë efektin që synohet – sepse po përplasen me fakte, me profesionalizëm institucional dhe me vlerësimin objektiv të drejtësisë”, ka shkruar Rama në Facebook.
Rama tutje ka theksuar se në një kohë kur kryeqyteti po ecën me projekte konkrete e me vizion të qartë zhvillimi, tentativa për ta ndalur këtë hov ‘me akuza të fabrikuara nuk është vetëm e dështuar, por edhe dëshpëruese’.
“Veçanërisht kur kjo vjen nga një pushtet qendror që REFUZON të përballet me DREJTËSINË për shkeljet e VETA dhe ndërkohë shfrytëzon mjetet publike për të ndërtuar narrativa politike ndaj institucioneve lokale”, ka shtuar ai.
Sipas tij, kjo është një përballje mes dy qasjeve asaj që ndërton dhe i shërben qytetarit dhe asaj që bllokon e saboton.
“Por drejtësia po e thotë fjalën e saj, qytetarët po e shohin realitetin – dhe Kryeqyteti nuk ndalet. Vazhdojmë”, ka shkruar në fund të postimit Rama.
