Prodhuesi amerikan i kompjuterëve dhe printerëve HP do të shkurtojë deri në 6 mijë vende pune globalisht gjatë tri vjetëve të ardhshëm, teksa kompania po përqendrohet në përdorimin e inteligjencës artificiale për të përshpejtuar zhvillimin e produkteve dhe për të përmirësuar shërbimin ndaj klientit.
Kompania, e cila ka rreth 56 mijë punonjës, tha se planet për shkurtimin e stafit do të ndodhin deri në fund të tetorit 2028 dhe do të prekë kryesisht ekipet që punojnë në zhvillimin e produkteve, operacionet e brendshme dhe mbështetjen e klientit.
Sipas The Guardian, ky plan pritet të kursejë një miliard dollarë në vit, ndërsa kostot e shkurtimeve vlerësohen rreth 650 milionë dollarë.
“Në të ardhmen shohim një mundësi të rëndësishme për të integruar AI-në në HP për të përshpejtuar inovacionin e produkteve, për të përmirësuar kënaqësinë e klientëve dhe për të rritur produktivitetin”, tha kryeshefi ekzekutiv i HP-së, Enrique Lores, transmeton KosovaPress.
Ky njoftim vjen ndërsa një organizatë britanike për kërkime edukative paralajmëroi se deri në vitin 2035 mund të zhduken deri në tre milionë vende pune me aftësi të ulëta për shkak të automatizimit dhe AI-së.
HP kishte kryer tashmë shkurtime prej deri në 2 mijë punonjës në shkurt si pjesë e një plani ristrukturimi.
