Në shënimin e Ditës së Lirisë, anëtari i kryesisë së PDK-së, Enver Hoxhaj, ka përkujtuar sakrificën e të gjithë atyre që kontribuuan për lirinë e Kosovës, duke shprehur respekt për heronjtë, dëshmorët dhe luftëtarët e UÇK-së.
Përmes një mesazhi publik, Hoxhaj theksoi se kjo ditë është një moment reflektimi dhe mirënjohjeje për brezin që bëri të mundur lirinë e vendit.
“Sot, në Ditën e Lirisë, përulemi me respekt para të gjithë atyre që sakrifikuan gjithçka që Kosova të jetojë e lirë. Lavdi heronjve, dëshmorëve, nderim luftëtarëve të UÇK-së dhe mirënjohje brezit që e bëri të mundur këtë ditë”, ka deklaruar ai.
Hoxhaj ka vlerësuar se Dita e Lirisë këtë vit shoqërohet edhe me një ndjenjë të veçantë shprese, duke iu referuar procesit gjyqësor ndaj ish-krerëve të UÇK-së në Hagë.
“Pas një rruge të gjatë e të vështirë, jemi më pranë se kurrë ditës kur Hashim Thaçi, Kadri Veseli, Rexhep Selimi dhe Jakup Krasniqi do t’u kthehen familjeve, miqve dhe Kosovës”, ka thënë ai.
Në fund të mesazhit, Hoxhaj ka theksuar se liria merr kuptim të plotë vetëm kur triumfon e vërteta.
“Liria ka kuptim vetëm kur triumfon e vërteta. Dhe e vërteta e Kosovës është e shkruar në sakrificën e bijve të saj. Urime Dita e Lirisë!”, përfundon mesazhi i kandidatit të PDK-së./teve1.info/
