Ish-ministri i Punëve të Jashtme të Kosovës, Enver Hoxhaj, ka kritikuar kryeministrin e Kosovës për deklaratën e tij, që anëtarësimi i Kosovës në Bashkimin Evropian mos të ndërlidhet me procesin e normalizimit të raportove me Serbinë.
Hoxhaj ka thënë se kjo deklaratë nuk i shërben Kosovës dhe është në interes të Serbisë.
“Duhet të ndahet procesi i anëtarësimit të Kosovës në BE nga procesi i normalizimit të marrëdhënieve me Serbinë” – paska thënë Kurti! Qëndrimi i kryeministrit për të ndarë normalizimin nga integrimi evropian nuk i shërben Kosovës, por është çlirim i Serbisë nga kushtëzimi evropian dhe në interes të Serbisë që ia mundëson asaj që edhe pa marrëveshje obligative ligjore dhe pa njohje të ndërsjellë, të mund të anëtarësohet në BE!”, ka shkruar Hoxhaj.
Kryeministri i Kosovës, Albin Kurti, të hënën, nga samiti i BE-së në Shkup ka thënë se duhet të ndahet procesi i anëtarësimit të Kosovës në BE nga procesi i normalizimit të marrëdhënieve me Serbinë.
“Duhet të ndahet procesi i anëtarësimit të Kosovës në BE nga procesi i normalizimit të marrëdhënieve me Serbinë. E kuptoj se BE-ja në thelb e ka fqinjësinë e mirë, por duhet kuptuar se nuk është kollaj të normalizohen marrëdhëniet me një shtet që nuk e ka prioritet as perëndimin as demokracinë’, ka thënë Kurti.
Ndryshe, Serbisë i është vendosur si kusht normalizimi i raporteve me Kosovën për ecjen përpara drejt anëtarësimit në BE.
