Deputetja e PDK-së, Eliza Hoxha, ka akuzuar zëvendëskryeministrin Besnik Bislimi, ministrin Hekuran Murati dhe ministren Albulena Haxhiu, për provokim dhe sulm, gjatë seancës së Kuvendit të Kosovës.
Ajo në konferncën për media bashkë me deputetin Lushtaku, tha se aksioni i tyre simbolik në Kuvend kundër aferës “Zdravo”, irritoi Bislimin.
Hoxha tha se në vend që sot të japin përgjegjësi pas publikimeve të video-incizimeve, pushteti dhunoi deputetët e opozitës.
“Aksioni ynë simbolik, irritoi zv.kryeministrin i cili e sulmoi kolegun Lushtaku. Bislimi e sulmoi kolegun tonë i cili as nuk e sulmoi as nuk e gjuajti me molotov as me zollë përveç se i freskoi pak në këtë situatë të tensionuar. U provokuam e u sulmuam nga zv.kryeministri Bislimi, ministrja Haxhiu e ministri Murati”, tha ajo.
Sipas saj krejt kjo u bë për të shmangur vëmendjen nga video-incizimet.
Në seancën e Kuvendit të Kosovës të enjten ka ndodhur një përleshje mes deputetëve të pozitës dhe opozitës.
Gjatë fjalimit të Kurtit, zëvendëskryeministri Bislimi largoi një fotografi ku shihet kryeministri me hund të madhe, ndërsa nga pamjet e kamerave shihet se deputeti i PDK-së, Mërgim Lushtaku shkonte drejt foltores së Kuvendit, ku ishte duke folur kryeministri Kurti e të cilit i hodhi ujë e më pas edhe Bislimit.
Pas kësaj ka reaguar ministri Murati për të ndalë, e Bislimi e gjuan me një shishe Lushtakun.
Në përleshje përfshihen edhe deputetë tjerë të PDK-së, ku nga pamjet shihet se Hajdar Beqa e godet ministrin Murati dhe shtynë ministren Haxhiu.
Kryetari i Kuvendit, Glauk Konjufca ka kërkuar që të ndërhyjë Policia e Kosovës.
