Ministri për Evropën dhe Punët e Jashtme, Ferit Hoxha, ka zhvilluar një takim me Sekretarin e Përgjithshëm të NATO-s, Mark Rutte, ku u diskutua mbi situatën aktuale gjeopolitike dhe rolin e Aleancës.
Hoxha u shpreh se takimi vjen në një kohë kur Shqipëria po merr më shumë angazhime dhe përgjegjësi brenda NATO-s.
“Ndamë mendimin se në mjedisin e sotëm të sigurisë, gjithnjë e më kompleks dhe të paparashikueshëm, NATO është më e rëndësishme dhe më e domosdoshme se kurrë. Forcimi i mbrojtjes kolektive, rritja e shpenzimeve të mbrojtjes, mbështetja e palëkundur për Ukrainën, si edhe zgjerimi i kapaciteteve industriale të mbrojtjes, mbeten prioritete për parandalimin, qëndrueshmërinë dhe sigurinë transatlantike”, tha Hoxha.
Sipas tij, Shqipëria ka dëshmuar vazhdimisht veten si një aleat i besueshëm dhe aktiv, duke rritur investimet në mbrojtje, modernizuar Forcat e Armatosura dhe marrë pjesë në misionet e NATO-s.
Ai theksoi gjithashtu rëndësinë e mbështetjes së vazhdueshme për Ukrainën përmes mekanizmave të NATO-s, përfshirë trajnimin, ndihmën dhe ndërtimin afatgjatë të kapaciteteve.
Sa i përket Ballkanit Perëndimor, Hoxha dhe Rutte riafirmuan se angazhimi i NATO-s mbetet thelbësor për stabilitetin dhe sigurinë në rajon. Hoxha vuri në dukje edhe rëndësinë e pranisë së KFOR-it në Kosovë, duke e cilësuar atë si një rol të domosdoshëm stabilizues.
Gjatë takimit u diskutua edhe përgatitja e Shqipërisë për organizimin e Samitit të ardhshëm të NATO-s në Tiranë, i pari samit i Aleancës që do të mbahet në Ballkanin Perëndimor.
“Ky angazhim përfaqëson një përgjegjësi historike dhe konfirmon rëndësinë strategjike të rajonit tonë”, u shpreh Hoxha.
